Мінчук ехаў мірыцца з былой дзяўчынай, але па дарозе зарабіў крымінальную справу і доўг на 20 тысяч. Як так выйшла?

У Мінску затрымалі 18-гадовага мясцовага жыхара, які разбіў шкло на двух прыпынках у горадзе, паведамілі ў ГУУС Мінгарвыканкама. Сам хлопец патлумачыў, што ехаў мірыцца з былой дзяўчынай, але быў п’яны і злосны праз тое, што транспарт доўга не ідзе.

Са словаў мінчука, ён позна ўвечары захацеў памірыцца з былой дзяўчынай і вырашыў паехаць да яе дадому на грамадскім транспарце. Але раззлаваўся ад доўгага чакання і пачаў граміць прыпынак.

«Усвядоміўшы наступствы, фігурант уцёк з месца здарэння, перайшоўшы на іншы прыпынак. Аднак там сітуацыя паўтарылася: спаганяючы свой гнеў, ён разбіў яшчэ адно шкляное перакрыцце», — расказалі ў ГУУС.

Пасля гэтага мінчук пайшоў дадому, дзе яго і затрымалі. Ён патлумачыў тое, што здарылася, тым, што быў п’яны.

Распачатая крымінальная справа. Акрамя гэтага, хлопец будзе абавязаны кампенсаваць нанесеную шкоду ў дзесяціразовым памеры — гэта больш за 20 тысяч рублёў.