Скажонае ўспрыманне рэальнасці. Сёстры Груздзевы расказалі «Люстэрку», чаму на вачах у дзяцей пажадалі Байдэну і Зяленскаму «здохнуць»

18 лiпеня 2023 у 1689667020
«Зеркало»

Нядаўна ў сеціце з'явілася відэа выступу праўладных спявачак сясцёр Груздзевых, якія выступілі ў лагеры «Дубрава» перад дзецьмі, прывезенымі ў Беларусь з акупаваных тэрыторый Украіны. Проста са сцэны яны пажадалі Байдэну і Зяленскаму «здохнуць», а Пуціну - «квітнець» і «ўзяць пад кантроль усю Украіну». Ролік чакана выклікаў абурэнне ў грамадстве - і «Люстэрка» папрасіла артыстак растлумачыць, што ўсё гэта было. Груздзевы расказалі нам, што выступ адбыўся 7 кастрычніка 2022-га, і здзівіліся, «што хтосьці раптам яго вырашыў апублікаваць». У артыстак своеасаблівае бачанне сітуацыі - тлумачым, чаму гэта даволі скажонае ўспрыманне рэальнасці.

Першым відэа апублікавала брытанскае выданне The Telegraph - яго гэтаму медыя перадало Народнае антыкрызіснае ўпраўленне. Выступаючы перад украінскімі дзецьмі, праўладныя спявачкі сказалі, што тыя «абраныя» і «шчасліўчыкі», а таксама пажадалі «хутчэй вырашыць гэтую сітуацыю».

- Каб Байдэн здох, божа, прабач мне. Зяленскі таксама. А Пуцін квітнеў і ўзяў пад свой кантроль усю Украіну. Божа. Вы ведаеце, мы ходзім у царкву, ставім свечкі за сваіх ворагаў. За Байдэна ставілі, за Зяленскага, - сказалі артысткі са сцэны.

Відэа шырока разышлося па сеціве - на гэта звярнулі ўвагу і самі Груздзевы, якія атрымалі мноства абураных іх учынкам каментароў. У сторыс у сябе ў Instagram яны выклалі скрыншоты некаторых водгукаў і, магчыма, са шчырым здзіўленнем спыталі: «Адкуль такая нянавісць?»

Спявачкі паспрабавалі апраўдацца за свае словы ў адрас Байдэна і Зяленскага, якія прагучалі ў роліку. Яны заявілі, што проста пажадалі прэзідэнтам ЗША і Украіны «такога здароўя, пра якое яны нават марыць не могуць», і наогул «агучылі думкі многіх людзей».

«Люстэрка» напісала Груздзевым у Instagram і задало два пытанні: «Чаму вы лічыце дапушчальным жадаць смерці людзям на вачах у дзясяткаў няпоўнагадовых?» і «Чаму дзеці, перад якімі вы выступалі, "абраныя"?»

Спявачкі адказалі нам, што «Зяленскі і Байдэн не могуць называцца людзьмі. Па іх віне загінула столькі людзей». На думку артыстак, «вайну развязала Амерыка, а не Расія».

Груздзевы сцвярджаюць, што агучылі не проста «думкі многіх людзей», але ўжо і «жаданне кожнага ўкраінскага дзіцяці, якое засынае і прачынаецца пад свіст снарадаў, і кожнага нармальнага чалавека».

«Вы асуджаеце нашыя праведныя словы, а чаму ж вы не асуджаеце Зяленскага і Байдэна за злачынствы супраць чалавецтва?» - спыталі ў нас у адказ артысткі.

Канкрэтных злачынстваў палітыкаў яны не назвалі, аднак упэўненыя, што «была магчымасць заключыць мір, але Байдэн забараніў Зяленскаму гэта рабіць». І тут жа расказалі чаму.

«Амерыцы так выгадныя войны! Няўжо яна адмовіцца ад таго, што прыносіць ёй казачны прыбытак?» - пытаюць сёстры. Якім чынам ЗША ўзбагачаюцца на вайне ва Украіне, яны таксама не патлумачылі.

«Усе разумеюць, што Расія падчас СВА (так Груздзевы называюць вайну Расіі супраць Украіны. - Заўв. рэд.) абараняе сваю зямлю, сваіх людзей і свае каштоўнасці, а таму перамога адназначна будзе за ёй! Тут няма ніякіх сумневаў! І, як сказаў нядаўна У. Пуцін: "Я веру, што перамога будзе заўсёды за намі. Мы пераможам, гэта адназначна, іншага не дадзена. І думаю, што нашая краіна ўрэшце будзе гарантам міру і бяспекі для ўсіх народаў, для ўсіх дзяржаваў свету". І так яно і будзе! Вось пабачыце!» - паабяцалі праўладныя спявачкі.

Нарэшце яны ўспомнілі, праз што, уласна, разгарэўся скандал з іх відэа - праз выступ перад вывезенымі з акупаваных украінскіх тэрыторый дзецьмі, якіх спявачкі назвалі «абранымі» і «шчасліўчыкамі»:

«Чаму гэтыя дзеці абраныя? Таму што Байдэн і Зяленскі абралі гэтых дзяцей для знішчэння - а Беларусь як можа адагравае іх ад гэтых жахаў, і як вы думаеце, што могуць пажадаць гэтыя дзеці прэзідэнтам Амерыкі і Украіны? Гэтыя дзеці пасля канцэрта абступілі нас з усіх бакоў і расказвалі тыя жахі, якія ім давялося перажыць!»

Што можа пагражаць Груздзевым

На нашую думку, што ў самім відэа, што ў адказе артыстак «Люстэрку» можна ўгледзець прапаганду вайны («Каб Пуцін квітнеў і ўзяў пад свой кантроль усю Украіну», «Усе разумеюць, што Расія падчас СВА абараняе сваю зямлю, сваіх людзей і свае каштоўнасці, а таму перамога адназначна будзе за ёй!»). Разглядаць такія заявы можна ў кантэксце адпаведнага артыкула 123 КК Беларусі (Прапаганда вайны). Максімальнае пакаранне па ім - пазбаўленне волі на тэрмін да трох гадоў.

Абвінавачанні Беларусі ў дэпартацыі ўкраінскіх дзяцей

27 красавіка гэтага года ПАСЕ прыняла рэзалюцыю, у якой прызнала гвалтоўную дэпартацыю ўкраінскіх дзяцей у Расію генацыдам, а Аляксандра Лукашэнку і ўрад Беларусі - датычнымі да яго.

У МЗС Беларусі запэўніваюць, што часовыя прыезды дзяцей на аздараўленне ў Беларусь «адбываюцца з прытрымліваннем адпаведных прававых працэдур, усе дзеці заязджаюць і выязджаюць з Беларусі легальна ў суправаджэнні дарослых, маючы на руках усе неабходныя дакументы».

Тым часам у Народным антыкрызісным упраўленні заявілі, што рыхтуюць дакументы на Лукашэнку ў Гаагскі суд праз вываз дзяцей з Украіны.

Раней Міжнародны крымінальны суд выдаў ордар на арышт прэзідэнта Расіі Уладзіміра Пуціна і ўпаўнаважанай па правах дзіцяці ў гэтай краіне Марыі Львовай-Бяловай за незаконную дэпартацыю і перамяшчэнне ўкраінскіх дзяцей.