Для беларусаў увялі новыя абмежаванні па «зялёнай карце». Цяпер гэты дакумент дакладна ператворыцца «ў гарбуз» для нашых кіроўцаў

З 1 чэрвеня больш чым 30 краін спынілі працу з Беларуссю па «зялёнай карце». Але гэта яшчэ не ўсё: з 16 і 30 чэрвеня па гэтых полісах з’явяцца новыя абмежаванні, яны закрануць краіны, што не ўваходзяць у Еўрапейскую эканамічную зону (ЕЭЗ), але знаходзяцца ў сістэме Green Card. Пра гэта паведамляе страхавая кампанія «Белдзяржстрах».

Што з пачатку чэрвеня адбылося з «Зялёнай картай»

Праз вайну ва Украіне, а таксама праз санкцыі заходніх краін супрацоўніцтва па сістэме «Зялёная карта» з Беларуссю (як і з Расіяй) некаторыя краіны спынілі з 1 чэрвеня. Сярод іх — Аўстрыя, Бельгія, Балгарыя, Вялікабрытанія, Венгрыя, Германія, Грэцыя, Данія, Ірландыя, Ісландыя, Іспанія, Італія, Кіпр, Латвія, Літва, Люксембург, Мальта, Нідэрланды, Нарвегія, Польшча, Партугалія, Румынія, Славакія, Славенія, Фінляндыя, Францыя, Харватыя, Чэхія, Швецыя, Швейцарыя, Эстонія.

Беларускія страхавыя кампаніі адмаўлялі ў заключэнні дамовы ўжо з 17 траўня, з гэтай даты прапаноўвалася афармляць альтэрнатыўны страхавы поліс проста на мяжы падчас уезду ў ЕС. Аднак у канцы траўня купіць поліс на мяжы ўдавалася не ўсім, выявілася, што кіроўцам трэба было паклапаціцца пра страхоўку загадзя.

Якія абмежаванні ўвядуць

Страхавая кампанія «Белдзяржстрах» паведаміла, што з 30 чэрвеня Генеральная асамблея Савета бюро сістэмы «Зялёная карта» на няпэўны тэрмін прыпыніла ўдзел у сістэме Расіі і Беларусі.

Вось якія абмежаванні чакаюць беларускіх кіроўцаў, якія выязджаюць за межы краіны:

• з 16 чэрвеня страхавыя кампаніі не павінныя выдаваць «зялёныя карты» для паездак у краіны, якія не ўваходзяць у Еўрапейскую эканамічную зону. Гаворка пра Албанію, Андору, Боснію і Герцагавіну, Іран, Сербію, Марока, Малдову, Паўночную Македонію, Чарнагорыю, Туніс і Турцыю. Раней выдадзеныя полісы (для паездак у краіны, якія не ўваходзяць у ЕЭЗ) з доўгім тэрмінам дзеяння будуць сапраўдныя да 23.59 (цэнтральнаеўрапейскі час) 29 чэрвеня. Тут улічылі той факт, што мінімальны тэрмін дзеяння «зялёнай карты» — 15 дзён;
• для трох краін, якія таксама не ўваходзяць у ЕЭЗ, зрабілі выключэнне. Гэта Азербайджан, Расія і Турцыя. Уводзячы абмежаванні, улічылі наяўнасць двухбаковых пагадненняў у галіне страхавання, падпісаныя Беларуссю, Расіяй, Азербайджанам і Турцыяй. У гэтыя краіны «зялёныя карты» працягнуць выдаваць да 23.59 29 чэрвеня. Прэтэнзіі пацярпелых у ДТЗ, якія адбыліся да 30 чэрвеня гэтага года, будуць урэгуляваныя ў стандартным парадку;
• у чацвер, 29 чэрвеня, у 23.59 страхавальнікі перастануць выдаваць «зялёныя карты» на транспарт, які выязджае ў Расію, Азербайджан і Турцыю. «Зялёная карта», складзеная да 30 чэрвеня 2023 года на беларускі транспарт, з тэрыторыяй дзеяння: Расія, Азербайджан, Турцыя — будзе лічыцца сапраўднай да заканчэння названага ў ёй тэрміну дзеяння, але не пазней за 28 чэрвеня 2024 года. Рэгуляванне страхавых выпадкаў па такіх дамовах мусіць ажыццяўляцца згодна з унутранымі палажэннямі сістэмы «Зялёная карта».

Як беларускія кіроўцы будуць ездзіць у Расію з 30 чэрвеня

— Раней абмежаванні (па «Зялёнай карце». — Заўв. рэд.) датычылі ў асноўным краін, якія ўваходзяць у Еўрасаюз, Шэнгенскую зону, цяпер уключылі і іншыя краіны, якія не ўваходзяць у Еўрапейскую эканамічную зону, але знаходзяцца ў сістэме «Зялёная карта». Напрыклад, тая ж Чарнагорыя, Расія, Турцыя, — растлумачылі ў «Белдзяржстраху». — Калі вы збіраецеся ехаць у Расію (30 чэрвеня і пазней. — Заўв. рэд.), то на іх тэрыторыі вы мусіце аформіць поліс АСАГА (абавязковае страхаванне аўтаграмадзянскай адказнасці). А калі вы едзеце ў Еўропу, то на мяжы афармляеце дамову памежнага страхавання, як было яшчэ з сярэдзіны траўня.

Чытайце таксама