Ганна Лукашэнка — нявестка Аляксандра Лукашэнкі — 5 траўня атрымала чарговую ўзнагароду з рук палітыка. Ёй дастаюцца смачныя кавалкі ў арганізацыі прапагандысцкіх праграм, на якія выдаткоўваюць вялікія грошы з бюджэту. Да таго ж адна з кампаній, якую з ёй звязваюць, таксама вельмі нядрэнна зарабляе. Расказваем падрабязнасці.
Фірмы, звязаныя з нявесткай Лукашэнкі
Ёсць як мінімум дзве кампаніі, якія звязваюць з нявесткай Лукашэнкі Ганнай, таксама вядомай пад псеўданімам Сялук. Гэта «АНСЛ прадакшн», дзе абрэвіятура нагадвае скарочаныя ініцыялы жонкі Дзмітрыя Лукашэнкі па-руску — «АНна Сергеевна Лукашенко». Фармальна яе ўладальнікам названы Андрэй Урублеўскі, якому належыць доля ў 95%. Ён — адзін з падначаленых Дзмітрыя Лукашэнкі, раней быў дырэктарам «Клуба тэніса», якім валодае Прэзідэнцкі спартыўны клуб пад кіраўніцтвам сярэдняга сына палітыка.
А таксама гэта медыяхолдынг «Музычная медыякампанія». Гэтая фірма запісаная на Палац Рэспублікі (30%) Кіраўніцтва справамі Лукашэнкі і названую вышэй «АНСЛ прадакшн» (70%). Аднак яе таксама звязваюць з Ганнай Сялук.
Як у іх з фінансамі
Абедзве кампаніі з’явіліся ў 2022 годзе і адразу пачалі нядрэнна зарабляць. Але, як відаць з фінансавых справаздач, у 2024-м даходы трохі прадзіравіліся.
Летась выручка «Музычнай медыякампаніі» за прададзеныя тавары, выкананыя работы ці аказаныя паслугі перавысіла 8,1 млн рублёў, вынікае з фінансавай справаздачы. Гэта на чвэрць больш, чым год таму. А прыбытак ад паслуг, то-бок розніца паміж выручкай і выдаткамі, звязанымі з іх рэалізацыяй, абвалілася з 1,2 млн да мінус 22 тыс.
Пры гэтым чысты прыбытак (даходы за вылікам выдаткаў і падаткаў) склаў больш за 1,27 млн рублёў, у той час як у 2023-м — амаль 1,5 млн.
Характэрна, што ў справаздачы кампаніі не пазначаная ніякая сума ў выдатках на падаходны падатак. Год таму такі ўнёсак у бюджэт быў 106 тыс. рублёў. Па іншых падатках і зборах фірма летась заплаціла 397 тыс. рублёў.
Што да «АНСЛ прадакшн», то ў яе даходы нашмат больш сціплыя. У гэтым выпадку выручка летась вырасла з 2 да 3 тыс. рублёў. А чыстая страта павялічылася з 67 да 105 тыс. Ад пакупнікоў прадукцыі і паслуг фірма атрымала ўсяго 13 тыс. рублёў. У той жа час на розныя выдаткі яна скіравала 147 тыс. Гэта ўключае набыццё тавараў і паслуг (64 тыс.), аплату працы (26 тыс. рублёў), аплату падаткаў (44 тыс.). Арганізацыя атрымала 150 тысяч крэдытаў.
Узнагароды для нявесткі
5 траўня Аляксандр Лукашэнка ўручаў узнагароды ў гонар 80-годдзя Перамогі ў Вялікай Айчыннай вайне. Адной з узнагароджаных была яго нявестка. Ганна Сялук атрымала медаль Францыска Скарыны. Пры гэтым яе назвалі генеральнай прадзюсаркай «Музычнай медыякампаніі». Такі ж медаль атрымаў дырэктар фірмы Андрэй Гузель. Больш нікому яе ў гэты дзень не ўручылі.
Медалём Францыска Скарыны ўзнагароджваюцца працаўнікі навукі, адукацыі і культуры за выбітныя дасягненні ў прафесійнай дзейнасці, значны асабісты ўнёсак у развіццё і памнажэнне духоўнага і інтэлектуальнага патэнцыялу, культурнай спадчыны беларускага народа.
Гэта не першая ўзнагарода, якую аўтарка прапагандысцкіх песняў і гімна пракуратуры атрымлівае з рук свайго свёкра. У 2023-м Лукашэнка ўзнагародзіў яе спецыяльнай прэміяй «За духоўнае адраджэнне».
Нагадаем, Ганна Лукашэнка кіравала рабочай групай па падрыхтоўцы «Рэспубліканскай грамадска-культурнай акцыі „Марафон адзінства“», а таксама была генпрадзюсаркай серыі канцэртаў «Кожны трэці», на якія з усёй краіны аўтобусамі звозілі гледачоў. У абодвух выпадках выдаткі за арганізацыю і, імаверна, паслугі нявесткі палітыка заплацілі з бюджэту.
Чытайце таксама
