Каля горада Магдэбург на ўсходзе Германіі з’ехаў з трасы і перакуліўся на дах у кювет міжгародні аўтобус, у якім знаходзіліся 54 чалавекі. Пра гэта паведамляюць мясцовая паліцыя і ратавальныя службы, піша выданне «Беларусь и мир». У МЗС Беларусі паведамілі, што ў аўтобусе знаходзіліся 12 беларусаў, сямёра з іх пацярпелі.
ДТЗ адбылося 10 лютага каля 03.12 раніцы ў раёне Магдэбурга, на аўтабане ў напрамку Гановера. З невядомай прычыны аўтобус з Польшчы з’ехаў з праезнай часткі, перакуліўся і застаўся ляжаць на даху ў кювеце. Магчыма, ён пайшоў у занос.
У выніку аварыі 35 з 54 чалавек пацярпелі, у тым ліку адзін з двух кіроўцаў. Сур’ёзныя траўмы атрымалі шэсць чалавек — іх даставілі ў бальніцу. Легкапаранёных і не пацярпелых на іншым аўтобусе павезлі ў цёплае памяшканне, дзе аказалі ім дапамогу.
У МЗС Беларусі паведамілі, што ў ДТЗ пацярпелі сямёра з 12 беларусаў, якія знаходзіліся ў аўтобусе.
— Паводле інфармацыі пасольства Беларусі ў Германіі, у аўтобусе знаходзіліся 12 грамадзян Беларусі, 7 з якіх атрымалі лёгкія траўмы, — расказалі ў ведамстве.
Там падкрэслілі, што пацярпелым на месцы аказаная медыцынская дапамога, яны былі дастаўленыя ў найбліжэйшыя бальніцы. Пасольства падтрымлівае пастаянны кантакт з кампетэнтнымі органамі Германіі.
Як піша NW са спасылкай на агенцтва dpa, у аўтобусе таксама былі пасажыры з Польшчы, Украіны і Бельгіі. Наймалодшым — каля 10 гадоў, самым узроставым — каля 60.
Аўтабан у напрамку Гановера на доўгі час перакрылі, быў арганізаваны аб’езд. Для ліквідацыі наступстваў давялося задзейнічаць два краны.
Таксама стала вядома, што аўтобус ехаў з Варшавы ў Бельгію. Пра гэта расказаў намеснік дырэктара турыстычнай кампаніі.