Больш за 90 чалавек пацярпелі падчас сутыкнення двух трамваяў у расійскім Кемераве. Падрабязнасці аварыі паведамілі ў ГУУС Кемераўскай вобласці.
Сутыкненне адбылося каля 7.30 паводле мясцовага часу. На апублікаваных у інтэрнэце відэа можна заўважыць, як трамвай на вялікай хуткасці ўваходзіць у паварот, а з вагона на дарогу вылятаюць людзі.
«Па гэтым факце ў следчым упраўленні СК Расіі па Кемераўскай вобласці — Кузбасе неадкладна распачатая крымінальная справа па ч. 2 арт. 238 КК РФ (Аказанне паслуг, якія не адпавядаюць патрабаванням бяспекі жыцця або здароўя спажыўцоў)», — гаворыцца ў рэлізе СК.
Як паведамляюць расійскія СМІ, паводле папярэдняй версіі, у аднаго з трамваяў адмовілі тармазы.
Як перадае РІА «Новости», у аварыі пацярпела больш за 100 чалавек. Сярод іх сямёра дзяцей.
«На жаль, нягледзячы на ўсе намаганні дактароў, памёр адзін з пацярпелых у аварыі на Логавай шашы. < … > Стан астатніх шпіталізаваных асцярог у дактароў не выклікае», — паведаміў кіраўнік горада Кемерава Дзмітрый Анісімаў.
На апублікаваных паліцыяй здымках відаць старая эмблема «Белкамунмаша» на адным з пашкоджаных вагонаў. У 2011 годзе ў мэрыі Кемерава паведамлялі, што ААТ «Кемераўская электратранспартная кампанія» пачало збіраць беларускія трамваі. Паведамлялася, што мінскі завод пастаўляе толькі кузавы, а цягавыя вазкі «былі капітальна адрамантаваныя ў дэпо Кемераўскай электратранспартнай кампаніі».
«Унікальнасць гэтага трамвая заключаецца ў тым, што дзякуючы кемераўскай зборцы ўдалося зэканоміць 3 млн расійскіх рублёў», — адзначалі ў мэрыі Кемерава.
Адзін з пасажыраў злашчаснага рэйса расказаў SHOT пра жах, які яны перажылі. Паводле яго, запханы трамвай пачаў набіраць хуткасць і, не скідваючы яе, павярнуў. Вырвала ўваходныя дзверы, людзі пачалі вылятаць з салона.
Пасля гэтага трамвай на поўным ходзе імчаў яшчэ каля 15 хвілін. Увесь гэты час «людзі ў салоне маліліся і спрабавалі звязацца з роднымі, разумеючы, што могуць сёння проста не вярнуцца дадому». Пацярпелі ў асноўным тыя, хто трымаўся за поручні і абапёрся на дзверы. Яны пачалі падаць.
За рулём трамвая была 23-гадовая жанчына, якая працавала машыністкай менш за год. Яе мама ў гутарцы з SHOT заявіла, што некаторыя ўжо спрабуюць абвінаваціць у тым, што здарылася, яе дачку, але яна ўпэўненая: прычына ў жахлівым стане трамваяў у Кемераве.