На жыхара вёскі Ушанка Краснаярскага краю завялі крымінальную справу па артыкуле пра забойства з асаблівай жорсткасцю пасля гібелі 17-гадовай школьніцы Мілены. Яе цела, разадранае свіннямі, было знойдзенае ў хляве. Першапачаткова меркавалася, што дзяўчына загінула ў выніку няшчаснага выпадку. Аднак следства выявіла, што перад смерцю мужчына ўдарыў яе паленам па галаве, гаворыцца ў прэс-рэлізе Следчага камітэта Расіі.
Паводле інфармацыі следства, падазраваны ў забойстве працаваў гавяднікам у АТ «Андронаўскі». Бацька загінулай дзяўчыны быў кіраўніком на ферме, і мужчыны рэгулярна канфліктавалі.
23 лістапада падазраваны, знаходзячыся ў нецвярозым стане, вырашыў з помсты забіць жывёлу бацькі дзяўчыны. Калі ён прыйшоў да пабудовы са свіннямі, то сустрэў там Мілену, якая іх карміла. Яны пасварыліся, і фігурант «ударыў пацярпелую некалькі разоў паленам па галаве». Яна страціла прытомнасць. Пасля гэтага мужчына забраў з месца здарэння тэлефон дзяўчыны і палена і спаліў іх у печы ў сябе дома.
Цяпер супрацоўнік АТ «Андронаўскі» затрыманы. Падчас допыту ён цалкам прызнаў віну. Вырашаецца пытанне пра абранне яму меры стрымання. Мужчыну пагражае пазбаўленне волі аж да пажыццёвага.
Нагадаем, 23 лістапада стала вядома, што ў хляве было знойдзенае цела 17-гадовай дзяўчыны. Меркавалася, што, калі яна карміла жывёлу, агрэсіўная свінаматка збіла школьніцу з ног: дзяўчынка стукнулася галавой і страціла прытомнасць, а пакуль яна была ў непрытомнасці, на яе накінуліся іншыя свінні. Бацькі забілі трывогу, калі дачка перастала адказваць на званкі. Яны папрасілі знаёмага адведаць яе, ён і знайшоў часткі цела адзінаццацікласніцы ў свінарніку.