Аляксандр Лукашэнка 23 студзеня абмеркаваў сітуацыю на мяжы. У Дзяржпамежкамітэце (ДПК) яго запэўнілі, што «становішча на дзяржаўнай мяжы застаецца прагназаваным і кантраляваным». Пра гэта піша выданне «СБ. Беларусь сегодня».
Паводле звестак ДПК, на сёння паблізу беларускай мяжы сканцэнтраваная групоўка ўзброеных фарміраванняў сумежных дзяржаваў Еўрасаюза і Украіны агульнай колькасцю каля 23,5 тысячы чалавек. Найбольш шматлікія вайсковыя фарміраванні сканцэнтраваныя ва Украіне — 17,2 тысячы і Польшчы — 3,7 тысячы.
«Вядзецца актыўная паветраная разведка беларускай тэрыторыі з выкарыстаннем беспілотных лётных апаратаў. З пачатку спецыяльнай ваеннай аперацыі зафіксаваныя 463 палёты беспілотнікаў уздоўж дзяржаўнай мяжы Беларусі», — піша выданне.
У ДПК таксама заявілі, што «ўкраінскі бок на ўсім участку мяжы актыўна ажыццяўляе правакацыі: пашкоджанне памежнай інфраструктуры, абразы і аказанне псіхалагічнага ціску на беларускіх памежнікаў, дэманстратыўныя дзеянні, у тым ліку з выкарыстаннем зброі, гукавой апаратуры, лазераў і ўлётак». У 2022 годзе было зафіксавана 88 такіх фактаў.
Што адбываецца на беларуска-ўкраінскай мяжы
Нагадаем, пасля абвяшчэння пра пачатак «спецыяльнай ваеннай аперацыі» Уладзімірам Пуціным 24 лютага расійскія войскі ўвайшлі ва Украіну ў тым ліку з тэрыторыі Беларусі, што зрабіла Беларусь суўдзельніцай акту ваеннай агрэсіі, нягледзячы на ўсе абяцанні Лукашэнкі ўкраінскім лідарам, што «ніколі з нашай тэрыторыі не будуць атакаваць Украіну».
За два дні да пачатку вайны найвышэйшыя службовыя асобы, у тым ліку міністр абароны Беларусі Віктар Хрэнін, а таксама кіраўнік Дзяржпамежкамітэта Анатоль Лапо запэўнівалі сваіх украінскіх калег, што тэрыторыя Беларусі не будзе выкарыстаная для нападу на Украіну.
Беларускі бок пастаянна абвінавачвае ўкраінскі ў «правакацыях». У прыватнасці, 9 кастрычніка мінулага года, старшыня ДПК Анатоль Лапо расказаў, што ўкраінцы ўзарвалі памежныя масты, замініравалі памежныя дарогі, а таксама пастаянна вядуць аэраразведку. Пазней ён прапанаваў украінскаму боку для «зніжэння напружанасці» прыбраць войскі ад мяжы з Беларуссю.
31 кастрычніка ён агучыў чарговыя прэтэнзіі ўкраінскаму боку — яго абурыла, што ўкраінцы на сваёй тэрыторыі «дэманстратыўна ўстанаўліваюць міны».