Урад прыдумаў, як выратаваць праблемныя арганізацыі ў сельскай гаспадарцы. Так, Саўмін прапануе амаль 130 з іх далучыць да буйных дзяржпрадпрыемстваў, а ўзамен хочуць даць пэўныя льготы. Такую прапанову сёння, 14 лютага, агучылі на нарадзе з удзелам урада і Аляксандра Лукашэнкі. Аднак палітык не падтрымаў ідэю Саўміна.
Урад прапанаваў увесці чарговыя меры па працы з праблемнымі арганізацыямі аграпрамысловага комплексу — далучыць іх да дзяржаўных прадпрыемстваў.
«Вы хочаце далучыць калгасы, саўгасы да дзяржаўных прамысловых прампрадпрыемстваў. Такое вам было даручэнне — каб мы гэты працэс пастаянна трымалі ў полі зроку і гэта рабілі, — удакладніў Аляксандр Лукашэнка. — Я вам даручыў гэты працэс трымаць у полі зроку і, калі трэба, унесці прапановы. Вы ўносіце прапанову. Якую? Каго сёння да каго будзем далучаць?»
Як растлумачыў міністр сельскай гаспадаркі і харчавання Ігар Брыло, гаворка пераважна пра 127 складаных сельгасарганізацый, паведамляе прэс-служба Аляксандра Лукашэнкі. З іх 117 знаходзяцца ў трох абласцях — Гомельскай (больш за 50), Магілёўскай і Мінскай. Паводле кіраўніка Мінсельгасхарча, у праекце спецыяльнага ўказа хочуць прапісаць умовы для тых дзяржпрадпрыемстваў, якія возьмуцца за нізкаэфектыўныя арганізацыі АПК.
Як паведамляецца, Аляксандр Лукашэнка ўдакладніў, «навошта мяняць нешта ў цяперашняй сістэме, калі і цяпер ёсць механізм для таго, каб далучаць, кажучы па-народнаму, калгасы, саўгасы да прадпрыемстваў», перадае яго прэс-служба.
У выніку Лукашэнка адхіліў ідэі ўрада па далучэнні. Як паведамляецца, Лукашэнка даручыў на ўзроўні мясцовых уладаў падрабязна разабрацца ў стане справаў па кожнай з праблемных сельгасарганізацый.
«Можа, некаму і трэба гэтую льготу даць, а некаму і не трэба. Мы ж гаворку вядзём пра далучэнне калгасаў і саўгасаў (лічы — дзяржаўная ўласнасць) да дзяржаўных прадпрыемстваў», — сказаў Лукашэнка.
Удакладнім, што ў Беларусі не першы год існуе практыка далучэння праблемных сельгасарганізацый да заводаў. Гэтым разам урад прапаноўваў ажыццявіць маштабнае далучэнне.
