Лідарка беларускіх дэмсілаў Святлана Ціханоўская паехала з рабочым візітам у Швецыю, дзе ёй прысудзілі прэмію памяці Анны Лінд. Яна сустрэлася з прэм’ер-міністрам краіны Ульфам Крыстэрсанам і міністрам абароны Полам Ёнсанам, з якімі абмеркавала сітуацыю ў Беларусі і праблему з легалізацыяй беларусаў за мяжой, паведамляе прэс-служба палітыка.
Перад цырымоніяй уручэння прэміі Ціханоўская сустрэлася з прэм’ер-міністрам Швецыі Ульфам Крыстэрсанам, з якім абмеркавала ўказ Лукашэнкі пра пазбаўленне беларусаў права на абмен пашпарта ў дыпмісіях. Яна папрасіла шведскі бок знайсці рашэнне, якое дапаможа беларусам з легалізацыяй. Палітык таксама расказала пра праект пашпарта Новай Беларусі і заклікала Швецыю падтрымаць гэтую ініцыятыву.
Таксама абмяркоўваліся ўдзел дэмакратычнай Беларусі ў міжнародных арганізацыях і еўрапейская перспектыва для нашай краіны. Ціханоўская заклікала шведскі бок падтрымліваць праграмы рэабілітацыі палітвязняў, незалежныя СМІ і культурныя праекты.
Прэм’ер паабяцаў, што Швецыя і далей будзе падтрымліваць дэмакратычную Беларусь.
Ціханоўская таксама сустрэлася з міністрам абароны Швецыі Полам Ёнсанам. Яны абмеркавалі сітуацыю з расійскай вайсковай прысутнасцю ў Беларусі, размяшчэннем ядзернай зброі ў Беларусі і правакацыямі на мяжы з ЕС. Ціханоўская звярнула ўвагу на пагрозы незалежнасці і суверэнітэту Беларусі з боку Расіі і заклікала падтрымаць беларускіх добраахвотнікаў ва Украіне рыштункам і несмяротным узбраеннем.
Абмяркоўвалася таксама магчымае супрацоўніцтва паміж Аб’яднаным пераходным кабінетам і Швецыяй у вайскова-палітычным кірунку.