Аляксандр Лукашэнка даў згоду на ўнясенне ў парламент праекта закона «Пра прыпыненне дзеяння Дамовы пра звычайныя ўзброеныя сілы ў Еўропе». Пра гэта паведамляе яго прэс-служба.
Гэтая дамова была ратыфікаваная Беларуссю і набыла моц у 1992 годзе. Яна прадугледжвае абмежаванне сумарных узроўняў звычайных узбраенняў і тэхнікі па пяці асноўных катэгорыях (танкі, баявыя браняваныя машыны, артылерыя, ударныя верталёты і баявыя самалёты), а таксама механізмы праверкі выканання абавязанняў (абмен інфармацыяй і правядзенне інспекцый).
«Праект закона прадугледжвае прыпыненне дзеяння ДЗУСЕ, але не азначае выхаду Беларусі з яе і спыненне ажыццяўлення ва ўзброеных сілах унутраных працэдур, звязаных з яе выкананнем. Беларусь у поўным аб’ёме выконвае абавязанні па дамове, у тым ліку няўхільна прытрымліваецца акрэсленых максімальных узроўняў наяўнасці ўзбраенняў, ваеннай тэхнікі і асабовага складу ўзброеных сіл», — гаворыцца ў паведамленні.
Нагадаем, у жніўні 2022 года Чэхія, а ў сакавіку 2023 года Польшча прынялі рашэнне пра невыкананне дамовы ў дачыненні да Беларусі. У адказ на гэта Аляксандр Лукашэнка падпісаў закон пра прыпыненне дзеяння ДЗУСЕ ў дачыненні да Польшчы і Чэхіі.
Расія прыпыніла дзеянне ДЗУСЕ яшчэ ў 2007 годзе, а ў 2023-м дэнансавала яе. Пасля гэтага ЗША і іх саюзнікі ў NATO прыпынілі ўдзел у дамове з 7 снежня 2023 года.
«Прыпыненне дзеяння дамовы дзяржавамі — чальцамі NATO і іх саюзнікамі фактычна азначае спыненне яе функцыянавання», — адзначылі ў прэс-службе Лукашэнкі.
