Тры дні таму ў тэлеграм-канале «Live. Супольнасць чыгуначнікаў Беларусі» з’явілася апытанне: «Калі б вы былі ўладальнікам канала і вашага сваяка ўзялі ў закладнікі і прапаноўвалі адпусціць у абмен на выдаленне канала, што б вы зрабілі?» У нядзелю адміністратар канала патлумачыў: сілавікі затрымалі яго роднага брата-падлетка.
«КДБ Беларусі захапіў і ўтрымлівае ў закладніках няпоўнагадовага роднага брата адміністратара @belzhd_live. Тэрарысты з КДБ вылучылі патрабаванне выдаліць Telegram-канал і спыніць дзейнасць», — гаворыцца ў паведамленні, апублікаваным 22 студзеня.
Як пішуць у канале, 15-гадовага Арцёма трое сутак трымалі ў ІЧУ на Акрэсціна па крымінальнай справе аб вымагальніцтве, не пускалі да яго ні адваката, ні бацькоў.
Затым, у пятніцу, падлетка вызвалілі з-пад варты і змясцілі ў Рэспубліканскі навукова-практычны цэнтр псіхічнага здароўя ў Навінках, дзе яго ўтрымліваюць дагэтуль. З яго ўзялі падпіску аб нявыездзе. Крымінальная справа (адміністратар падкрэслівае, што яна сфабрыкаваная) не спыненая.
Нагадаем, тэлеграм-канал @belzhd_live дзякуючы інсайдарскай інфармацыі са структур чыгункі падчас вайны ва Украіне стаў важнай крыніцай інфармацыі пра перамяшчэнні па Беларусі расійскіх войскаў і ваеннай тэхнікі, перавозкі зброі.
