Аляксандр Лукашэнка 24 студзеня падпісаў указ № 19 «Аб звальненні ў запас і прызыве на тэрміновую вайсковую службу, службу ў рэзерве», паведаміла яго прэс-служба.
Дакументам прадугледжваецца прызваць у лютым-сакавіку 2023 года на тэрміновую вайсковую службу, службу ў рэзерве грамадзян Беларусі мужчынскага полу, якім да дня прызыву споўнілася 18 гадоў і якія не маюць права на адтэрміноўку ад прызыву, грамадзян прызыўнога ўзросту, якія страцілі права на адтэрміноўку, а таксама на службу ў рэзерве грамадзян з ліку студэнтаў першага курса ўстановаў вышэйшай адукацыі сельскагаспадарчага профілю, якія маюць права на адтэрміноўку ад прызыву для працягу адукацыі і выказалі жаданне прайсці такую службу.
Прыняцце ўказа дазволіць рэспубліканскім органам дзяржаўнага кіравання, мясцовым выканаўчым і распарадчым органам своечасова правесці мерапрыемствы па прызыве грамадзян на тэрміновую вайсковую службу і службу ў рэзерве.
Адначасова ўказам прадугледжваецца звальненне ў запас вайскоўцаў тэрміновай службы, якія выслужылі ўстаноўленыя тэрміны вайсковай службы.