Новая пастанова ўрада мяняе дзейны парадак праходжання вайсковых і спецыяльных збораў. Адпаведны дакумент апублікаваны на Нацыянальным прававым інтэрнэт-партале. Параўналі старую і новую версію — і расказваем пра галоўныя змены.
Праверачныя зборы — да 60 дзён замест 35
Зборы падпадзяляюцца на некалькі катэгорый: вучэбныя зборы прыпіснога складу; па падрыхтоўцы вайсковаабавязаных па вайскова-ўліковых спецыяльнасцях; вучэбныя зборы па абслугоўванні тэхнікі недатыкальнага запасу; зборы па праверцы мабілізацыйнай гатоўнасці вайсковых частак і іншых вайсковых фарміраванняў (праверачныя зборы).
Такая градацыя засталася і цяпер. Але вось тэрміны ў некаторых катэгорый змяніліся. Калі раней праверачныя зборы былі да 35 дзён, то нова пастанова павялічвае іх працягласць да 60 дзён.
Некаторых на зборы змогуць прызываць часцей
У старым дакуменце выразна прапісвалася, колькі разоў на зборы якой працягласці могуць прызывацца вайсковаабавязаныя. У новай пастанове працягласць збораў прыбралі, пакінуўшы колькасць прызываў.
Мяркуючы з усяго, некаторых вайсковаабавязаных, якія не маюць афіцэрскіх званняў, змогуць часцей прызываць на зборы за час запасу.
| Катэгорыя вайсковаабавязаных без афіцэрскіх званняў | Было | Стала |
| першага разраду першай катэгорыі | да трох разоў працягласцю да двух месяцаў кожны раз | да пяці разоў |
| першага разраду другой катэгорыі | да чатырох разоў працягласцю да двух месяцаў кожны раз | да пяці разоў |
| другога разраду | да двух разоў працягласцю да двух месяцаў кожны раз | да трох разоў |
| трэцяга разраду | адзін раз працягласцю да 35 дзён | адзін раз |
Змены закранулі і афіцэраў запасу. І тут усё выглядае нашмат сур’ёзней, хоць працягласць збораў і перыядычнасць у новай рэдакцыі таксама не прапісаныя.
| Катэгорыя афіцэраў запасу | Раней | Цяпер |
| першага разраду | адзін раз на два гады працягласцю да двух месяцаў кожны раз | да дзесяці разоў |
| другога разраду | да двух разоў працягласцю да 35 дзён кожны раз | да пяці разоў |
| трэцяга разраду | адзін раз працягласцю да 35 дзён | да пяці разоў |
Зборамі будзе займацца яшчэ і КДБ. А адправяць на іх не толькі здольных па стане здароўя
Яшчэ адно змяненне: раней на вайсковыя і спецыяльныя зборы накіроўваліся «вайсковаабавязаныя, прыдатныя па стане здароўя да вайсковай службы». Новы дакумент прадпісвае, што на зборы будуць накіроўвацца «вайсковаабавязаныя, прыдатныя па стане здароўя да вайсковай службы, прыдатныя да вайсковай службы з нязначнымі абмежаваннямі, а таксама абмежавана прыдатныя да вайсковай службы ў ваенны час (з іх пісьмовай згоды)».
Змены таксама прадугледжваюць узмацненне ролі КДБ у правядзенні збораў. Напрыклад, раней адбор кандыдатаў для прызыву на вайсковыя і спецыяльныя зборы праводзіўся ваеннымі камісарыятамі, яны ж маглі запрашаць вайсковаабавязаных на ўдакладненне уліковых звестак. Цяпер гэта змогуць рабіць і рэгіянальныя ўпраўленні Камітэта дзяржбяспекі. Дарэчы, калі раней з позвай для праходжання збораў патрабавалася з’явіцца ў ваенны камісарыят, то цяпер там можа аказацца «УКДБ па вобласці».
Пастанова ўступае ў сілу пасля яе афіцыйнага апублікавання.