Сіноптыкі адрэдагавалі прагноз надвор’я на найбліжэйшыя дні, і нам ён не спадабаецца. На сераду абвешчаны жоўты ўзровень небяспекі, а ў чацвер адчувальна пахаладае. Пра гэта паведамляе Белгідрамет Мінпрыроды.
«22 лістапада, у сераду, на асобных участках дарог чакаецца галалёдзіца», — гаворыцца ў паведамленні.
А вось 23 лістапада, у чацвер, надвор’е значна пагоршыцца. Ноччу пераважна па паўночна-заходняй палове, раніцай і днём на большай частцы тэрыторыі краіны пройдуць ападкі — снег, мокры снег, удзень з дажджом. Удзень месцамі па паўночным усходзе Беларусі — моцны снег, мокры снег. Месцамі чакаюцца мяцеліца, наліпанне мокрага снегу, раніцай і днём — слабы галалёд. На асобных участках дарог захаваецца галалёдзіца.
Вецер паўднёва-заходні, заходні парывісты, ноччу па паўночным захадзе, раніцай і днём у многіх раёнах моцны парывісты. Тэмпература паветра мінімальная ноччу −4…−11°C, пры праясненнях паветра будзе астуджацца да -13°C, максімальная днём складзе ад -3°C па ўсходзе да + 6 °C па захадзе краіны.