Жыхара Кобрына абвінавачваюць у пералічэнні даната і выкарыстанні хакерскіх праграм для ажыццяўлення DDoS-атак. Дэталі крымінальнай справы расказала прэс-служба Следчага камітэта.
Абвінавачанаму 36 гадоў. Паводле звестак следства, у жніўні 2020 года ён перавёў 60 даляраў у падтрымку беларусаў, якія пацярпелі ад гвалту з боку сілавікоў. Акрамя таго, у сакавіку 2023 года кобрынец на сваім камп’ютары «актываваў шкодныя праграмы, з дапамогай якіх на розныя інтэрнэт-рэсурсы ажыццяўляліся DDoS-атакі, якія пацягнулі парушэнне працы сістэм абароны і камп’ютарных сістэм».
У прэс-рэлізе СК адзначаецца, што на этапе следства мужчына «перавёў 2000 рублёў на дабрачынны рахунак спецыялізаванай агульнаадукацыйнай школы-інтэрната». Тым не менш ад крымінальнага пераследу гэта яго не ўратавала.
Мужчыну выставілі абвінавачанне паводле арт. 361−2 КК (Фінансаванне дзейнасці экстрэмісцкага фармавання) і ч. 1 арт. 354 КК (Выкарыстанне шкодных камп’ютарных праграм).
Раней праваабарончы цэнтр «Вясна» расказваў, што абвінавачанага завуць Пётр Ярмашук. Яго крымінальную справу суд пачаў разглядаць 21 лістапада. Паводле звестак праваабаронцаў, данат мужчына пералічыў праз Facebook у фонд BYSOL, які на той час не быў прызнаны «экстрэмісцкім фарміраваннем». Што да другой часткі абвінавачання, то, як сцвярджае СК, Ярмашук 1 сакавіка 2022 года запампаваў з сайта ItArmy of Ukraine некалькі файлаў, якія дазваляюць праводзіць DDoS-атакі. Потым «не менш за восем разоў» запускаў на сваім камп’ютары праграму, праз што «парушалася сістэма абароны ад DDoS-атак» і «была парушаная праца нявысветленых інтэрнэт-рэсурсаў Расійскай Федэрацыі».
«На судзе Ярмашук спачатку заявіў пра поўнае прызнанне віны, але пасля падрабязных роспытаў сказаў, што пераводзіў грошы ініцыятыве BYSOL не на „экстрэмісцкую дзейнасць“ (як сцвярджала абвінавачанне), а з дабрачыннымі мэтамі. Пра праграму для DDoS-атак сказаў, што выкарыстаў яе з цікаўнасці», — піша «Берасцейская Вясна»
Пракурорка запатрабавала для Ярмашука чатыры гады калоніі агульнага рэжыму.
Чытайце таксама
