Прадстаўнік прэс-службы паліцыі Маямі ў каментары Tribuna.com раскрыў абставіны смерці Канстанціна Кальцова.
«Паводле звестак следства, у панядзелак, 18 сакавіка 2024 года, прыкладна ў 12.39 паліцыя і пажарныя ратавальнікі Бал-Харбара былі скіраваныя ў гатэль St. Regis Bal Harbour Resort, 9703 Collins Avenue, з нагоды мужчыны, які скокнуў з балкона. Аддзел забойстваў паліцыі акругі Маямі-Дэйд узяў на сябе расследаванне відавочнага самагубства Канстанціна Кальцова (04/17/1981). Ніякіх падазроных абставінаў не выявілі», — заявіў прадстаўнік прэс-службы паліцыі.
Нагадаем, раней «Люстэрка» са спасылкай на дзве не звязаныя паміж сабой крыніцы з блізкага атачэння Канстанціна Кальцова паведамляла пра яго гібель. Пазней пра смерць Кальцова паведамілі ў Беларускай федэрацыі хакея і прэс-службе «Салавата Юлаева». Дакладныя абставіны гібелі экс-хакеіста не былі вядомыя.
Канстанцін Кальцоў — выхаванец мінскага «Юнацтва». Гуляў на пазіцыі форварда. У 1999 годзе ён быў выбраны «Пітсбургам» у першым раўндзе праекта пад 18-м нумарам. Усяго ў НХЛ правёў 144 гульні, у якіх набраў 38 (12+26) ачкоў. Шмат гадоў Канстанцін выступаў на высокім узроўні ў Расіі. Ва ўфімскім «Салаваце Юлаеве» ў 2008-м стаў чэмпіёнам Расіі, а ў 2011-м — уладальнікам Кубка Гагарына. За зборную Беларусі згуляў на дзвюх Алімпіядах і дзевяці чэмпіянатах свету ў наймацнейшым дывізіёне.
Кальцоў завяршыў выступленні ў 2016-м у складзе мінскага «Дынама». Потым кансультаваў будаўнічую кампанію, якая ўзводзіла дзве арэны ў комплексе «Алімпік Парк».
Трэнерскую кар’еру Канстанцін пачаў у мінскім «Дынама», асістуючы Гордзі Дуаеру. Потым была самастойная праца ў «Брэсце» і «Дынама-Маладзечне». Пасля гэтага Кальцоў вярнуўся ў КХЛ: адзін сезон ён быў памочнікам галоўнага трэнера ў маскоўскім «Спартаку» і два — у «Салаваце Юлаеве». У сезоне-2023/24 уфімскі клуб прайграў у 1/8 фіналу плэй-оф.
18 сакавіка хакейнае агенцтва Winners у тэлеграм-канале паведаміла, што Кальцоў не падоўжыць дамову з «Салаватам Юлаевым» і працягне працу ў іншым клубе.