У выніку тэракту 1 кастрычніка ў ізраільскім горадзе Яфа цяжка паранены 27-гадовы грамадзянін Беларусі, паведамілі ў беларускім МЗС.
«Са шкадаваннем паведамляем, што ў выніку тэракту 1 кастрычніка 2024 года ў горадзе Яфа (Ізраіль) быў цяжка паранены грамадзянін Беларусі 1997 года нараджэння. Амбасада знаходзіцца ў кантакце з мясцовымі кампетэнтнымі ўладамі і медыцынскай установай, у якую быў шпіталізаваны пацярпелы. Прагнозы дактароў на цяперашні час пазітыўныя», — гаворыцца ў паведамленні міністэрства.
У МЗС звярнулі ўвагу, што ў сувязі з абвастрэннем абстаноўкі захоўвае сваю актуальнасць рэкамендацыя па магчымасці ўстрымацца ад паездак у шэраг краін Блізкага Усходу, у першую чаргу Ізраіль і Ліван.
«У выпадку неадкладнай неабходнасці наведвання блізкаўсходняга рэгіёна грамадзянам Беларусі варта строга ўлічваць наяўную сітуацыю, паклапаціцца пра сваю бяспеку, адсочваць афіцыйныя паведамленні авіяцыйных уладаў адносна ўвядзення абмежаванняў на выкарыстанне паветранай прасторы альбо пра прыпыненне працы аэрапортаў. Гэта датычыць усіх краін, якія закранутыя канфліктам альбо знаходзяцца па суседстве», — паведамілі ў МЗС.
Нагадаем, у аўторак, 1 кастрычніка, двое тэрарыстаў адкрылі агонь па людзях, што выйшлі з трамвая. Адзін з іх быў узброены штурмавой вінтоўкай, а другі — нажом.
У выніку тэракту загінулі прынамсі шэсць чалавек, яшчэ дзевяць атрымалі раненні. У паліцыі расказалі, што нападнікі былі «нейтралізаваныя».