Суд Ленінскага раёна Мінска 20 снежня 2024 года вынес прысуд па справе ў дачыненні да 39-гадовага мінчука, якога судзілі за абразу Аляксандра Лукашэнкі, паведамляе прэс-служба інстанцыі.
15 лістапада 2024 года 39-гадовы мінчук, знаходзячыся ў стане алкагольнага ап’янення каля аднаго з дамоў па вуліцы Маякоўскага, падышоў да сябраў ініцыятыўнай групы грамадзян, якія займаліся зборам подпісаў за вылучэнне кандыдатам у прэзідэнты Аляксандра Лукашэнкі.
У матэрыялах суда гаворыцца, што мінчук публічна, у прысутнасці некалькіх чалавек, агучыў негатыўны каментар пра яго, выкарыстоўваючы непрыстойную форму. Суд адзначыў, што дзеянні абвінавачанага мелі наўмысны характар, скіраваны на публічнае прыніжэнне гонару і годнасці Аляксандра Лукашэнкі.
Суд прызнаў мужчыну вінаватым і прызначыў пакаранне ў выглядзе пазбаўлення волі тэрмінам на 1 год і 6 месяцаў з адбываннем пакарання ў папраўчай калоніі строгага рэжыму.