Падчас размовы Уладзіміра Пуціна з жыхарамі Марыупаля хтосьці выгукнуў, што ўсё, што адбываецца — няпраўда. Фрагмент трапіў на відэа, апублікаванае на сайце Крамля, яго таксама размясцілі многія тэлеграм-каналы.
Прэзідэнт Расіі прыляцеў у Марыупаль з Крыма ў ноч на 19 сакавіка. Праехаўшы па горадзе, ён спыніўся ў двары аднаго з нядаўна пабудаваных жылых дамоў. Як піша прэс-служба Крамля, «у мікрараёне Неўскі Уладзімір Пуцін пагутарыў з жыхарамі Марыупаля».
На відэазапісе падчас гэтай сустрэчы чуваць, як нехта крычыць: «Гэта ўсё няпраўда! Гэта ўсё напаказ!» Пасля чаго суправаджальнікі расійскага прэзідэнта пачалі азірацца вакол.
Чытачы тэлеграм-канала «Маріуполь.Спротив» ідэнтыфікавалі некаторых з тых, хто дзякаваў Пуціну за новае жыллё. Яны напісалі, што на відэа сапраўды ёсць мясцовыя жыхары. Чытачы сцвярджаюць, што падчас бамбёжак некаторыя з іх займаліся марадзёрствам.
Марыупаль быў захоплены расійскай арміяй у траўні 2022 года пасля двух месяцаў аблогі і цяжкіх баёў. Мэр горада Вадзім Байчэнка ў пачатку чэрвеня расказаў, што расійскія войскі «разбурылі ў попел» палову шматпавярховых дамоў у горадзе.
