У Міністэрстве абароны Расіі заявілі пра далейшыя баі ў заходняй частцы Бахмута. Ва ўкраінскім Генштабе паведамілі, што расіяне таксама спрабавалі наступаць у раёне Аўдзееўкі. У амерыканскім Інстытуце па вывучэнні вайны адзначаюць, што расійскае вайсковае камандаванне вымушанае задзейнічаць на Бахмуцкім напрамку часткі, якія панеслі страты ў Харкаўскай вобласці і на поўдні Украіны.
Расказваем пра галоўнае са зводак штабоў і высноваў экспертаў на 442-ы дзень вайны ва Украіне.
Генштаб УСУ: Адбілі каля 40 атак на чатырох напрамках
У мінулыя суткі расійскія войскі ўдарылі ракетай С-300 па цывільнай інфраструктуры населенага пункта Канстанцінаўка ў Данецкай вобласці. Акрамя таго, нанеслі 45 авіяцыйных удараў і правялі 53 абстрэлы з рэактыўных сістэм залпавага агню па пазіцыях УСУ і населеных пунктах Херсонскай вобласці. Пацярпелі мірныя жыхары, разбураныя і пашкоджаныя жылыя дамы і іншая цывільная інфраструктура. Пра гэта паведамляе Генштаб УСУ ў ранішняй зводцы.
— Расіяне па-ранейшаму канцэнтруюць асноўныя намаганні на Ліманскім, Бахмуцкім, Аўдзееўскім і Мар'інскім напрамках — УСУ адбілі тут 39 атак. Таксама працягваюцца жорсткія баі за гарады Бахмут і Мар'інка.
— На Северскім і Слабажанскім напрамках за суткі расіяне абстралялі з мінамётаў і артылерыі 16 населеных пунктаў Чарнігаўскай, Сумскай і Харкаўскай абласцей.
— На Купянскім напрамку праціўнік наступальных дзеянняў не праводзіў. Нанёс авіяўдары па трох населеных пунктах, з артылерыі і мінамётаў абстраляў дзевяць населеных пунктаў.
— На Ліманскім напрамку расійскія войскі вялі беспаспяховыя наступальныя дзеянні ў раёне Серабранскага лясніцтва. Авіяўдарам падвергліся тры населеныя пункты. Артылерыйскім абстрэлам — шэсць.
— На Бахмуцкім напрамку праціўнік вёў беспаспяховыя наступальныя дзеянні ў Бахмуце. Нанёс авіяўдары па раёнах пяці населеных пунктаў. Ад абстрэлаў пацярпелі восем населеных пунктаў.
— На Аўдзееўскім напрамку расіяне спрабавалі наступаць у раёне Аўдзееўкі. Нанеслі авіяцыйныя ўдары па раёнах двух населеных пунктаў, абстралялі — чатыры.
— На Мар'інскім напрамку падраздзяленні Сіл абароны адбілі шматлікія атакі расійскіх сіл у раёне горада Мар'інка. Абстрэлам падвергліся два населеныя пункты.
— На Шахцёрскім напрамку расійскія войскі цягам сутак вялі наступальныя дзеянні ў раёне Новаміхайлаўкі, але поспеху не мелі. Пад авіяўдары трапілі раёны Прачыстаўкі і Навасёлак. Абстраляныя чатыры населеныя пункты.
— На Запарожскім і Херсонскім напрамках праціўнік абараняецца. Нанёс авіяцыйныя ўдары па раёнах пяці населеных пунктаў, абстраляў 21 населены пункт Данецкай, Запарожскай, Днепрапятроўскай і Херсонскай абласцей.
— Авіяцыя Сіл абароны за мінулыя суткі нанесла чатыры ўдары па раёнах канцэнтрацыі асабовага складу і ваеннай тэхнікі расіян.
— За мінулыя суткі знішчаныя пяць беспілотных лётных апаратаў розных тыпаў.
— Падраздзяленні ракетных войскаў і артылерыі пабілі зенітна-ракетны комплекс, два раёны канцэнтрацыі жывой сілы, склад гаруча-змазачных матэрыялаў, два артылерыйскія падраздзяленні на агнявой пазіцыі, а таксама станцыю радыёэлектроннай барацьбы расійскіх войскаў.
«За апошнія тры дні расійская акупацыйная адміністрацыя „эвакуявала“ каля 300 мясцовых жыхароў, у прыватнасці дзяцей, з часова захопленых тэрыторый Запарожскай вобласці ў Бярдзянск», — заявілі ў Генштабе.
Мінабароны РФ: у Херсонскай вобласці збілі ўкраінскі Су-25
— На Купянскім напрамку ўдарамі авіяцыі, агнём артылерыі Заходняй групоўкі войскаў нанесенае паражэнне падраздзяленням УСУ ў раёнах населеных пунктаў Двурэчная, Цімкаўка Харкаўскай вобласці і Навасёлаўскае Луганскай вобласці. У раёне населенага пункта Іванаўка Харкаўскай вобласці спыненыя дзеянні ўкраінскай дыверсійна-разведвальнай групы.
Страты УСУ за суткі склалі да 125 вайскоўцаў, чатыры аўтамабілі, а таксама самаходная артылерыйская ўстаноўка «Акацыя». Акрамя таго, у раёне населенага пункта Няскучнае Харкаўскай вобласці знішчаны склад боепрыпасаў 67-й механізаванай брыгады УСУ.
— На Чырвона-Ліманскім напрамку авіяцыяй, агнём артылерыі групоўкі войскаў «Цэнтр» пабітыя падраздзяленні УСУ ў раёнах населеных пунктаў Неўскае, Чырвоная Дзіброва Луганскай вобласці, а таксама Серабранка Данецкай вобласці. За суткі знішчаныя да 65 украінскіх вайскоўцаў, дзве баявыя браніраваныя машыны, а таксама дзве гаўбіцы Д-20 і Д-30.
— На Данецкім напрамку штурмавыя атрады працягваюць весці наступ у заходняй частцы Бахмута. Паветрана-дэсантныя войскі аказвалі ім падтрымку і скоўвалі падраздзяленні УСУ на флангах. Ударамі авіяцыі, агнём артылерыі пабітыя жывая сіла і тэхніка УСУ ў раёнах населеных пунктаў Краснае, Калінаўка і Яр Данецкай вобласці.
За мінулыя суткі на гэтым напрамку знішчаныя да 230 украінскіх вайскоўцаў і добраахвотнікаў, шэсць аўтамабіляў, гаўбіца Д-30, а таксама радыёлакацыйная станцыя контрбатарэйнай барацьбы AN/TPQ-50. Акрамя таго, у раёне горада Краматорск Данецкай вобласці знішчаны склад артылерыйскіх боепрыпасаў 54-й механізаванай брыгады УСУ.
— На Паўднёва-Данецкім і Запарожскім напрамках ударамі авіяцыі і агнём артылерыі групоўкі войскаў «Усход» нанесенае паражэнне падраздзяленням УСУ ў раёнах населеных пунктаў Вуглядар, Прачыстаўка Данецкай вобласці, Малінаўка, Гуляйполе, Новаданілаўка і Каменскае Запарожскай вобласці. За суткі на гэтых напрамках знішчылі звыш 110 украінскіх вайскоўцаў, а таксама сем аўтамабіляў. У раёне населенага пункта Гуляйполе Запарожскай вобласці знішчаны склад боепрыпасаў 102-й брыгады тэрытарыяльнай абароны.
— На Херсонскім напрамку ў выніку агнявога паражэння за суткі знішчаныя да 20 украінскіх вайскоўцаў, тры аўтамабілі, адна артылерыйская сістэма М777 вытворчасці ЗША, гаўбіца «Мста-Б», а таксама самаходная артылерыйская ўстаноўка «Гваздзік». У раёне горада Херсон знішчаны склад боепрыпасаў 124-й брыгады тэрытарыяльнай абароны.
Усяго за суткі, паводле МА РФ, пабітыя 96 артылерыйскіх падраздзяленняў, жывая сіла і тэхніка УСУ ў 123 раёнах.
СПА ў раёне населенага пункта Чырвоны Маяк Херсонскай вобласці збіла самалёт Су-25 Паветраных сіл Украіны. За суткі перахопленыя 12 рэактыўных снарадаў сістэмы залпавага агню HIMARS, знішчаныя 12 беспілотных лётных апаратаў.
Інстытут па вывучэнні вайны: Расіяне нанеслі авіяўдары па ўкраінскіх пазіцыях у Херсонскай і Запарожскай абласцях
Украінскія сілы правялі паспяховыя абмежаваныя контратакі і трохі прасунуліся ў раёне Бахмута. Як адзначаюць эксперты Інстытута па вывучэнні вайны, кадры з пацверджанай геалакацыяй паказваюць, што УСУ, імаверна, правялі паспяховыя контратакі на поўнач ад Хромава (на захад ад Бахмута) і на паўночны захад ад Белай Гары (14 км на паўднёвы захад ад Бахмута) і трохі прасунуліся ў гэтых раёнах.
Аналітыкі таксама кажуць, што сцверджанні ўкраінскіх крыніц пра тое, што УСУ знішчылі 6-ю і 8-ю роты 72-й мотастралковай брыгады 3-га армейскага корпуса пад Бахмутам і прасунуліся на 2,6 км уздоўж 3-кіламетровай лініі фронту ў гэтым раёне, візуальнага пацверджання пакуль не маюць. Але гэта б азначала, што Украіна дасягнула больш значных поспехаў пад Бахмутам.
У ISW адзначаюць, што паўсюдныя праблемы з баяздольнасцю Расіі, якія пагаршаюцца далейшымі атакамі на знясіленне ў раёне Бахмута, імаверна, значна абмяжоўваюць здольнасць расійскіх сіл у гэтым раёне абараняцца ад лакальных украінскіх контратак. Там прыводзяць прыклад з 72-й асобнай мотастралковай брыгадай, якая была сфарміраваная ў складзе 3-га армейскага корпуса ў 2022 годзе з добраахвотніцкіх батальёнаў. У верасні 2022 года яна панесла значныя страты падчас украінскага наступу ў Харкаўскай вобласці. Украінскія СМІ выказалі здагадку, што ацалелыя падраздзяленні 72-й брыгады маглі перакінуць у Мікалаеўскую вобласць, дзе яны зноў панеслі страты падчас контрнаступлення на поўдні Украіны ў кастрычніку 2022 года. Магчымае рашэнне расійскага ваеннага камандавання зноў задзейнічаць на Бахмуцкім напрамку часткі гэтага фарміравання, што панесла дзве паслядоўныя паразы, разам з ужо знясіленымі падраздзяленнямі ПВК Вагнера, імаверна, даюць УСУ магчымасць праводзіць абмежаваныя контратакі, заўважаюць аналітыкі.
У справаздачы амерыканскага інстытута надаецца ўвага заявам расійскага боку пра нанясенне ўдару па камандным цэнтры, дзе знаходзіліся высокапастаўленыя ўкраінскія ваеначальнікі і афіцыйныя асобы. Нібыта ў выніку маглі загінуць галоўнакамандуючы УСУ генерал Валерый Залужны і іншыя высокапастаўленыя камандзіры. Намесніца міністра абароны Ганна Маляр назвала гэтую інфармацыю хлуснёй, мэта якой — падарваць маральны дух украінцаў. У ISW адзначаюць, што няма ніякіх доказаў, якія пацвярджаюць гэтыя заявы Расіі. Эксперты таксама кажуць, што расійскія крыніцы спрабуюць прадставіць усё больш руцінныя паветраныя і ракетныя ўдары як тыя, што стрымліваюць патэнцыйныя ўкраінскія контрнаступальныя аперацыі.
На што яшчэ звярнулі ўвагу эксперты:
- Міністэрства абароны ЗША пацвердзіла, што ўкраінскія сілы паспяхова збілі расійскую ракету з дапамогай сістэмы супрацьракетнай абароны Patriot. Адміністрацыя Байдэна таксама абвясціла пра новы пакет ваеннай дапамогі Украіне на суму 1,2 мільярда даляраў;
- расійскія войскі нанеслі наземныя ўдары ў раёне Купянска і Крамянной;
- расійскія сілы і найміты ПВК Вагнера працягвалі наступальныя аперацыі ў Бахмуце і яго ваколіцах 10 траўня, нягледзячы на пагрозы Яўгена Прыгожына адысці з гэтага раёна;
- расійскія войскі працягвалі абмежаваныя наступальныя дзеянні на фронце Аўдзееўка — Данецк;
- расійскія сілы нанеслі авіяўдары па ўкраінскіх пазіцыях у Херсонскай і Запарожскай абласцях;
- Пуцін падпісаў штогадовы ўказ пра прызыў грамадзян з запасу на вайсковыя зборы;
- расійскія акупацыйныя ўлады працягваюць высяляць жыхароў з дамоў на акупаваных тэрыторыях пад выглядам гуманітарнай эвакуацыі.