На мысе Тарханкут у акупаваным Крыме раніцай 23 жніўня былі чуваць выбухі. Пра гэта паведамляюць мясцовыя тэлеграм-каналы. Паводле папярэдняй інфармацыі, могуць быць пашкоджаныя расійскія вайсковыя аб’екты.
Першыя паведамленні пра выбухі і фатаграфіі дыму з’явіліся каля 10 гадзін раніцы. Іх дасылалі з пасёлка Аляноўка, размешчанага паблізу мыса Тарханкут, крайняга заходняга пункта Крыма.
Мясцовыя рэсурсы паведамляюць, што ўсяго было 7 выбухаў паблізу Аляноўкі, пасля чаго ў бок мыса праляцелі чатыры расійскія знішчальнікі.
Розныя крыніцы — у прыватнасці, прэс-сакратар Украінскай добраахвотніцкай арміі Поўдзень і чалец грамадскай рады пры Адэскай АВА Сяргей Братчук і дарадца мэра Марыупаля Пётр Андрушчанка — сцвярджаюць, што на мысе Тарханкут былі пабітыя расійскія вайсковыя аб’екты.
Паводле іх словаў, знішчаны ракетны супрацькарабельны комплекс «Бастыён» — гэта адзін з носьбітаў ракет «Онікс», якімі расіяне наносяць удары па Украіне.
Таксама сцвярджаецца, што пабітыя радыёлакацыйныя станцыі, у прыватнасці 48Я6-К1 «Падлёт», прызначаная для выяўлення паветраных цэляў на малых і гранічна малых вышынях і выдавання цэлеўказанняў зенітна-ракетным комплексам С-300, С-400 і іншым.
Гэтая інфармацыя на дадзены момант не пацверджаная. Афіцыйныя крыніцы пра выбухі ў Крыме пакуль не паведамлялі.
Дарэчы, напярэдадні кіраўнік разведкі Украіны Кірыл Буданаў анансаваў непрыемнасці для расійскіх вайскоўцаў у Крыме — казаў, што «днямі» ўкраінцы «ўбачаць», як на тэрыторыі Крыма знішчаюць акупантаў.
Дапоўнена ў 13.25. Ведамства Буданава пацвердзіла атаку. Як паведамляе Галоўнае ўпраўленне разведкі Мінабароны Украіны, каля 10.00 на мысе Тарханкут выбухам была знішчаная расійская зенітна-ракетная сістэма вялікага і сярэдняга радыусу дзеяння С-400 «Трыумф».
«У выніку выбуху цалкам знішчаная сама ўстаноўка, размешчаныя на ёй ракеты і асабовы склад. Улічваючы абмежаваную колькасць такіх комплексаў на ўзбраенні ворага, гэта балючы ўдар па сістэме СПА акупантаў, які будзе мець сур’ёзны ўплыў на далейшыя падзеі ў акупаваным Крыме», — заявіла ўкраінская разведка.
Ведамства таксама размясціла відэа атакі. Удар па ўстаноўцы быў нанесены з паветра.
Расійскі бок пакуль ніяк не каментаваў тое, што адбылося.
Чытайце таксама
