У эфіры тэлеканала «Расія-1» прагучалі пагрозы ў адрас еўрапейскіх сталіц у выпадку размяшчэння ў Еўропе амерыканскіх дальнабойных ракет. Як піша «Агентство», сюжэт паказалі ў нядзельным выпуску «Вести в 20.00».
Вядоўца Яўген Папоў расказаў пра планы ЗША размясціць у Германіі ракеты SM-6 і Tomahawk, а потым паказаў адказ прэс-сакратара прэзідэнта Дзмітрыя Пяскова, які сказаў: «У нас хапае патэнцыялу для таго, каб стрымліваць гэтыя ракеты. Але патэнцыйныя ахвяры — сталіцы гэтых дзяржаваў».
«Нескладана дапусціць геаграфію адказу ў выпадку, калі кароткі прэс-рэліз Белага дома стане рэальнасцю», — сказаў вядоўца тэлеканала. У гэты момант на экране з’явілася карта Еўропы з патэнцыяльнымі цэлямі Расіі: «Пад пагрозай без малога ўсе еўрапейскія сталіцы».
У якасці патэнцыйных цэляў у эфіры паказалі Парыж, Берлін, Прагу, Варшаву, Бухарэст, Талін і Рыгу. Таксама, паводле вядоўцы, пад пагрозай амерыканскія вайсковыя базы ў Германіі Шпангдалем, Рамштайн, Казармы Патча, Гарміш-Партэнкірхер.
«Асаблівая ўвага Брытаніі, нашаму традыцыйнаму ворагу», — сказаў Папоў. Паводле яго, у гэтай краіне пад пагрозай Лондан, Манчэстэр, Бірмінгем, вайсковыя базы Дэвенпорт, Клайд Портсмут і Чатэмская верф.
«Брытанія ў самым уразлівым становішчы. У прынцыпе, дастаткова трох ракет, і гэтая цывілізацыя абрынецца», — сказаў на заканчэнне Папоў.
Нагадаем, раней пагрозы нанесці ўдар па Еўропе гучалі і з вуснаў Пуціна. Так, у канцы траўня расійскі прэзідэнт заявіў, што еўрапейскім краінам, калі яны прымаюць рашэнне, ці даваць Украіне дазвол на выкарыстанне сваіх ракет для ўдараў па тэрыторыі Расіі, варта памятаць пра тое, што ў іх вялікая шчыльнасць насельніцтва і невялікія тэрыторыі.
Пра планы размясціць у Германіі дальнабойную зброю Белы дом абвясціў на мінулым тыдні. Як вынікае з заявы, ракеты SM-6 і Tomahawk, а таксама гіпергукавая зброя, якая імі распрацоўваецца і «якая мае значна большую далёкасць, чым цяперашнія наземныя агнявыя сродкі ў Еўропе», ЗША плануюць размяшчаць на базах у Германіі з 2026 года з абарончай мэтай.