Дэпутат Меджліса Азербайджана Расім Мусабекаў заявіў, што «расійскі бок мусіць папрасіць прабачэння» за крушэнне самалёта Embraer E190AR авіякампаніі Azerbaijan Airlines, які ляцеў з Баку ў Грозны, піша «Агентство».
«Самалёт быў збіты на тэрыторыі Расіі, у небе Грознага. Адмаўляць гэта немагчыма. <…> Тыя, хто гэта здзейсніў, павінныя панесці крымінальную адказнасць, і мусіць быць выплачаная кампенсацыя. Калі гэтага не адбудзецца, то, вядома, адносіны пяройдуць на іншы ўзровень», — заявіў азербайджанскаму выданню Turan Мусабекаў.
Ён таксама адзначыў, што «нехта ў Расіі ажыццяўляе пэўныя дзеянні ў СМІ, каб замесці сляды гэтага».
Мусабекаў таксама нагадаў, што ў 2020 годзе, калі Азербайджан збіў расійскі верталёт над Арменіяй, Баку папрасіў прабачэння і паабяцаў пакараць вінаватых. «Такія цывілізаваныя адносіны. Калі працуе СПА, то аэрапорт мусіць быць закрыты, трэба паведамляць, каб сюды ніхто не прылятаў. Таму вінаватыя мусяць быць прыцягнутыя да адказнасці», — дадаў азербайджанскі дэпутат.
Гэта першая афіцыйная рэакцыя з Баку пасля навіны, што крыніцы Euronews і Reuters ва ўрадзе Азербайджана заявілі, што самалёт пацярпеў крушэнне пасля ўдару расійскай ракетай.
Прэзідэнт Азербайджана Ільхам Аліеў у сераду развярнуў самалёт, на якім ляцеў у Санкт-Пецярбург на паседжанне Найвышэйшага еўразійскага эканамічнага савета, даведаўшыся пра крушэнне Embraer E190AR. У міжнародным аэрапорце Баку ён правёў нараду па здарэнні, пасля якой заявіў, што «прычыны аварыі нам не вядомыя» і «яшчэ рана пра гэта казаць».
Нагадаем, авіякатастрофа адбылася 25 снежня. Самалёт Embraer 190AR «Азербайджанскіх авіяліній» выконваў рэйс Баку — Грозны. Яго перанакіравалі ў Махачкалу нібыта праз туман, а адтуль лайнер вылецеў у казахстанскі горад Актау з прычыны няштатнай сітуацыі. На борце было 67 чалавек, у тым ліку 16 расіян. З іх сямёра загінулі, агульная колькасць ахвяр — 38.
Выжылыя пасажыры расказалі, што на борце было некалькі выбухаў. Хваставая частка лайнера мела мноства адтулін, іх прычына пакуль не высветленая, але эксперты дапускаюць, што гэта можа быць абстрэл расійскай СПА.