Прэзідэнт ЗША Дональд Трамп на мітынгу пасля інаўгурацыі ў прысутнасці прыхільнікаў падпісаў указ пра адмену 78 выканаўчых рашэнняў прэзідэнта Джо Байдэна, а таксама пра выхад ЗША з Парыжскага пагаднення.
Перад падпісаннем ён заявіў, што «адменіць амаль 80 разбуральных і радыкальных выканаўчых актаў папярэдняй адміністрацыі», дадаўшы, што «ўсе яны стануць несапраўднымі цягам прыкладна пяці хвілін».
Сярод першых распараджэнняў Дональда Трампа:
- увядзенне мараторыю на прыняцце бюракратамі новых нарматыўных актаў «да поўнага кантролю» над федэральным урадам;
- прадпісанне федэральнаму ўраду наконт аднаўлення свабоды слова і адмены цэнзуры;
- прыпыненне найму на дзяржаўную службу за выключэннем вайскоўцаў і некаторых іншых катэгорый;
- распараджэнне, каб усе дзяржслужбоўцы неадкладна вярнуліся да працы ў офісах, адмовіўшыся ад дыстанцыйнага фармату;
- распараджэнне, каб усе федэральныя ведамствы заняліся ліквідацыяй праблемы росту кошту жыцця;
- забарона на выкарыстанне судовай сістэмы для пераследу палітычных апанентаў ранейшай адміністрацыі;
- ліст у ААН пра выхад ЗША з Парыжскага пагаднення па клімаце.
Завяршыўшы зацверджанне дакументаў, Трамп кінуў у натоўп сваіх прыхільнікаў некалькі асадак, якімі ён падпісваў распараджэнні, перадае CNN. Пасля мерапрыемства ён скіраваўся ў Белы дом, каб падпісаць новыя ўказы.
У Белым доме ён падпісаў указ пра памілаванне ўдзельнікаў штурму Капітолія 6 студзеня 2021 года. Ён закране 1,5 тысячы чалавек.
Дональд Трамп таксама падпісаў указ пра выхад з Сусветнай арганізацыі аховы здароўя (СААЗ), дакумент апублікаваны Белым домам.
На думку новага прэзідэнта ЗША, яго краіна плаціць арганізацыі зашмат грошай у параўнанні з іншымі.
«Кітай, насельніцтва якога складае 1,4 млрд чалавек, складае 300% насельніцтва Злучаных Штатаў, аднак яго ўнёсак у СААЗ амаль на 90% меншы», — гаворыцца ў дакуменце.
Трамп падпісвае ўказ пра выхад ЗША з СААЗ і Парыжскага пагаднення ўжо другі раз.