Адзін з вечароў у караоке-бары забаўляльнага комплексу «Павуціна» ў Салігорску скончыўся «горача»: хлопец, якога выгналі за непрыстойныя паводзіны, вярнуўся з каністрай бензіну і ўчыніў сапраўдны перапалох. Ніхто не пацярпеў, але маладога чалавека пакаралі за п’яную выхадку даволі жорстка. Дэталі справы выкладзеныя ў прысудзе, апублікаваным у банку судовых рашэнняў.
Паводле матэрыялаў суда, інцыдэнт адбыўся позна ўначы, пасля паўночы. Іван (імя змененае) разам з сябрамі святкаваў дзень нараджэння сваёй стрыечнай сястры, паралельна ў караоке адпачывалі і іншыя кампаніі. Хлопец нямала выпіў і ў нейкі момант пачаў чапляцца да старонніх дзяўчат, гаварыць ім непрыстойнасці, размахваць рукамі. Ахова прымусіла Івана пакінуць бар. Сыходзячы, той быў у гневе, паабяцаў вярнуцца і агучыў ахоўніку на ўваходзе нецэнзурную пагрозу.
Праз гадзіну малады чалавек сапраўды вярнуўся — прычым на машыне, нягледзячы на тое, што быў п’яны. Ён дастаў з багажніка 20-літровую пластыкавую бутэльку з вадкасцю, закінуў на плячо і пайшоў ва ўстанову (усё гэта знялі камеры відэаназірання). Увайшоўшы ўнутр і наблізіўшыся да дзвярэй караоке-бара, Іван зняў з бутэлькі корак і пачаў дэманстратыўна разліваць на падлогу вадкасць — гэта быў бензін.
Той самы ахоўнік, які стаяў на ўваходзе, тут жа кінуўся на Івана і паваліў яго на падлогу, пасля ён тлумачыў, што ўсур'ёз баяўся і за сябе, і за адпачывальнікаў у бары — многія маглі б пацярпець, калі б бензін загарэўся. Закранутая падчас барацьбы бутэлька звалілася і пакацілася па прыступках, што вялі ўніз у караоке-бар, а з яе працягваў вылівацца бензін, запырскваючы ўсё вакол. Гэтую карціну назіралі наведнікі ўстановы, некаторым бензін заліў вопратку і абутак — яны сур’ёзна спалохаліся. Але на дапамогу ахоўніку па трывожным сігнале ўжо прымчаліся яго калегі, сітуацыю ўзялі пад кантроль. А крыху пазней Івана перадалі міліцыі, якая прыехала на месца.
Супраць яго завялі крымінальную справу пра хуліганстве па ч.1 арт. 339 КК, хлопец быў узяты пад варту і змешчаны ў СІЗА. Пацярпелымі па справе прызналі ахоўніка і дзвюх дзяўчат, якія знаходзіліся ля ўваходу ў бар у момант інцыдэнту. Ва ўсіх траіх былі пашкоджаныя бензінам адзенне і абутак, але Іван кампенсаваў ім шкоду.
На судзе малады чалавек цалкам прызнаў сваю віну. Ён расказаў, што быў пакрыўджаны на ахоўніка, які, як яму здавалася, абышоўся з ім няправільна. Сышоўшы з бара, ён заехаў дадому, узяў бутлю з-пад вады, на запраўцы заліў у яе 10 літраў бензіну, вярнуўся ва ўстанову і зрабіў тое, што зрабіў. Паводле Івана, ён зусім не збіраўся падпальваць разліты бензін, а толькі хацеў напалохаць ахоўніка і «сапсаваць яму настрой».
Суд прызнаў Івана вінаватым у хуліганстве — наўмысных дзеяннях, якія груба парушаюць грамадскі парадак, выказваюць відавочную непавагу да грамадства і суправаджаюцца пагрозай выкарыстання гвалту, пашкоджаннем чужой маёмасці.
«Дэманструючы сваю п’яную зухаватасць і грэбаванне агульнапрынятымі правіламі паводзін, слоўна і шляхам дэманстратыўнага вылівання бензіну ў памяшканні забаўляльнага комплексу П. пагражаў ужываннем гвалту ў дачыненні да ахоўніка комплексу Б. і прысутных у комплексе асоб, што пацягнула пашкоджанне адзення Б.» — так ахарактарызаваў суд дзеянні хлопца.
Нягледзячы на станоўчыя характарыстыкі Івана, адсутнасць папярэдніх судзімасцяў і тое, што ён добраахвотна кампенсаваў шкоду, суддзя вырашыў, што малады чалавек, які адзін раз пахуліганіў п’яным, не выправіцца, калі не адправіць яго ў калонію.
У выніку хлопца асудзілі на 1 год пазбаўлення волі ва ўмовах агульнага рэжыму. Таксама ён мусіць выплаціць пацярпеламу ахоўніку 2000 рублёў у якасці кампенсацыі маральнай шкоды.
Чытайце таксама
