На 44-м годзе жыцця не стала беларускай дызайнеркі Ганны Краснер. Інфармацыя пра гэта з’явілася 7 лістапада на яе старонцы ў Instagram.
«У нас гора, памерла Ганна. У яе спынілася сэрца, была хуткая, рэанімацыя ў бальніцы», — паведамляецца ў сацсетках дызайнеркі.
Пахаванне Ганны пройдзе ў Варшаве на праваслаўных могілках у раёне Воля. Інфармацыя пра час развітання будзе апублікаваная пазней.
Ганна Краснер нарадзілася ў Віцебску. Пасля школы яна паступіла ў тэхналагічны ўніверсітэт. Скончыўшы ВНУ, яна па размеркаванні трапіла ў Магілёў — на фабрыку «Вяснянка», дзе працавала мастаком. Потым вярнулася ў Віцебск і пасля дэкрэту ўладкавалася канструктарам адзення ў вясельны салон. Пазней Ганна стварыла сваю першую калекцыю з чатырох сукенак. Усе працы яна прадала.
— Я рызыкавала страціць грошы, выдаткаваныя на матэрыялы. На шчасце, усё атрымалася, — расказвала дызайнерка газеце «Витебские вести».
Ганне пачалі паступаць першыя заказы. Неўзабаве яна адкрыла ўласную справу — «Майстэрню Ганны Краснер».
Як пісаў сайт Belarus Fashion Week, працы Ганны вылучаліся «арыгінальным дызайнам, якаснымі матэрыяламі, ручной карпатлівай працай і прафесійным пашывам».
Работы майстаркі не раз адзначаліся на конкурсах моды і прыгажосці.
13 ліпеня 2021 года Ганна напісала ў Facebook, што закрыла сваю майстэрню ў Беларусі.
«Проста прыйшоў час нешта мяняць… Мяняем», — патлумачыла яна.
Наступны пост у Facebook Ганны з’явіўся ў красавіку 2023 года. У якасці лакацыі ў ім была адзначаная Польшча.
«У мяне так часта пыталі, чаму я больш не шыю сукенак. Што пасля чарговага чаму я вырашыла, што так, я хачу паспрабаваць. Цяпер я шыю сукенкі. Пакуль няшмат, пакуль у якасці хобі (вельмі прафесійнага хобі) па пары заказаў на месяц», — расказвала Ганна.