Амерыканка Келсі Хэтчэр 19 і 20 снежня нарадзіла дзвюх дзяўчынак. Нараджэнне двайнят ці блізнят — не самая рэдкая падзея. Ды і для самой жанчыны гэтыя роды былі ўжо чацвёртымі. Аднак гэтая яе цяжарнасць была вельмі незвычайнай: двух новых дзяцей Келсі вынасіла адначасова ў дзвюх матках. Справаздачу пра ўнікальныя роды апублікаваў сайт Універсітэта Алабамы ў Бірмінгеме, у бальніцы якога нарадзіліся дзяўчынкі.
Пра перадгісторыю ўнікальнага з’яўлення на свет малых мы расказвалі ў лістападзе. Келсі Хэтчэр даведалася пра асаблівасці свайго развіцця, якая сустракаецца ў 0,3% жанчын, у 17-гадовым узросце (цяпер ёй 32 гады). У яе падваенне маткі — то-бок дзве асобныя маткі, правая і левая, кожная з уласнай шыйкай. З таго часу Келсі тройчы была цяжарнай і без ускладненняў нарадзіла траіх дзяцей. А вось чацвёртая цяжарнасць прынесла сюрпрыз: у кожнай з матак знайшлі па дзіцяці. Паводле ацэнак медыкаў, гэта сапраўды вельмі рэдкі выпадак — яго імавернасць яны ацэньваюць як адзін шанец на мільён. Паводле прагнозаз медыкаў, унікальная двойня мусіла з’явіцца на свет пад Каляды — 25 снежня.
Унікальная цяжарнасць Келсі Хэтчэр працякала без асаблівых сюрпрызаў. Паводле ацэнак медыкаў, яе двайняты развіваліся нават у больш «камфортных» умовах, чым «звычайныя». Падчас тыповай цяжарнасці двойняй яна развіваецца ў адной матцы, што абмяжоўвае прастору для кожнага дзіцяці і павялічвае імавернасць заўчасных ці ранніх родаў. Кожнае ж з дзяцей Келсі мела ўласныя матку, плацэнту і пупавіну, што давала ім больш прасторы і рэсурсаў для росту і развіцця.
Самаадвольных родаў у жанчыны не адбывалася, таму медыкі вырашылі іх стымуляваць. Пры гэтым ёй прызначылі дзвюх акушэрак для родадапамогі і назірання за кожнай з матак. Келсі расказвае:
— Калі ў мяне пачаліся схопкі, яны не былі адначасовымі (для розных матак. — Заўв. рэд.), а ішлі ў межах некалькіх секунд адна за адной. Я таксама адчувала, што кожны бок сціскаецца ў розных месцах.
Яе правая матка, на «рахунку» якой ужо былі дзве цяжарнасці, аказалася гатовай да родаў раней. У 19.45 увечары 19 снежня з яе натуральным шляхам нарадзілася дзяўчынка Роксі вагой 3,4 кг. Пасля гэтага Келсі, перажываючы пасляродавы працэс у правай матцы, пачала нараджаць левай. Фактычна яна адчувала схопкі, кормячы грудзьмі ўжо народжаную дзяўчынку. Крыху больш чым праз 10 гадзін пасля нараджэння першай дзяўчынкі, у 6.10 раніцы 20 снежня, з дапамогай кесарава сячэння на свет з’явілася яе сястра, Рэбел. Яе вага склала 3,3 кг.
Цікава, што з пункту гледжання медыцыны нельга даць адназначнага адказу на пытанне, ці двайняты Роксі і Рэбел. Тыповая цяжарнасць двойняй вызначаецца як развіццё двух дзяцей у адной матцы падчас адной цяжарнасці. Унутры Келсі дзеці раслі ў розных матках. Але пры гэтым яны развіліся з дзвюх яйкаклетак, якія былі аплодненыя падчас аднаго цыклу авуляцыі. То-бок цяжарнасць Роксі і Рэбел была ўсё ж «агульнай». На думку прафесара аддзялення мацярынска-плодавай медыцыны Універсітэта Алабамы ў Бірмінгеме, доктара Рычарда Дэвіса, дзяўчынак можна лічыць двайнятамі:
— Урэшце, у адным жываце адначасова аказаліся двое немаўлят. Проста ў іх былі розныя «кватэры».
Чытайце таксама
