Барэц грэка-рымскага стылю Кірыл Маскевіч заявіў, што не задаволены ўмовамі, у якія пастаўленыя беларусы на міжнародных спаборніцтвах, паведамляе Sport5.by.
«Калі толькі нас дапусцілі, а барцоў дапусцілі аднымі з першых, мы радаваліся любым умовам. Але, выступаючы ўжо паўгода і падымаючыся на п’едэстал, калі замест сцяга ўздымаецца нейкі белы квадрацік, а замест гімна грае нейкая незразумелая музыка, якую ты чуеш упершыню, на душы непрыемна», — сказаў Маскевіч, які заваяваў ліцэнзію на Гульні ў Парыж.
Паводле спартоўца, «трэба аддаць належнае нашай федэрацыі, якая дома сустракае са сцягам і гімнам». Гэта дадае Кірылу «яшчэ большай радасці ад перамог».
Маскевіч стаў уладальнікам бронзы лютаўскага чэмпіянату Еўропы. Украінец Жан Белянюк, які таксама быў трэцім (у барацьбе ўручаюць два бронзавыя медалі) пасля ўзнагароджання адмовіўся фатаграфавацца з беларусам.
Нагадаем, 8 снежня мінулага года выканаўчы камітэт МАК прынял рашэнне пра тое, што беларусы і расіяне змогуць выступіць на Гульнях у Парыжы 2024 года ў нейтральным статусе. У такім статусе будуць дапушчаныя толькі індывідуальныя атлеты, якія пройдуць кваліфікацыю ў рамках наяўных крытэраў адбору. Спартоўцы і персанал, якія «актыўна падтрымліваюць вайну», не будуць дапушчаныя да ўдзелу ў спаборніцтвах. Гэта датычыць і тых, у каго ёсць кантракт з вайсковымі арганізацыямі ці органамі бяспекі. На АГ-2024 не атрымаюць запрашэння чыноўнікі і чальцы ўрадаў. Таксама будуць забароненыя беларускі і расійскі сцягі, гімны і любое абазначэнне нацыянальнай прыналежнасці.
Чытайце таксама
